"Kurtlar Vadisi" sevənlərə şad xəbər: "Cerrahpaşalılar" filmi ilə əfsanə geri dönür!

Türk televiziya tarixinin unudulmaz seriallarından olan "Kurtlar Vadisi"nin ən yadda qalan personajlarından biri yenidən ekranlara qayıdır. Serialda "Cerrahpaşalı Halit" obrazı ilə tamaşaçıların rəğbətini qazanan aktyor Özcan Varaylı illər sonra məhz bu xarakterin ətrafında cəmləşən "Cerrahpaşalılar" filmi ilə izləyicilərin qarşısına çıxmağa hazırlaşır. Çəkilişlərinə artıq start verilən yeni layihə qısa zamanda kino və serial sevərlərin böyük marağına səbəb olub.

Güclü Aktyor Heyəti və Döyüş Səhnələri

Güc, sədaqət və xəyanət mövzularının mərkəzdə dayandığı "Cerrahpaşalılar" filminin aktyor heyətində türk kinosunun müxtəlif nəsillərini təmsil edən tanınmış simalar yer alıb. Baş rolu ifa edən Özcan Varaylı ilə yanaşı filmdə Atilla Olgaç, Ümit Acar, Erdem Kaynarca, Melih Çardak, Levent Çakır, Sena Gençtürk və Erhan Çircioğlu kimi aktyorlar çəkiliblər.

Yeni ekran əsərinin ən diqqətçəkən tərəfi isə onun yüksək səviyyəli texniki təminatı və döyüş (aksiyon) səhnələridir. Filmdəki gərgin toqquşmaların və aksiyon sekanslarının unikal, peşəkar şəkildə lentə alınması üçün ABŞ-dən xüsusi mütəxəssis heyəti dəvət olunub. Yüksək temp və xüsusi effektlərlə zənginləşdirilmiş film köhnə "Kurtlar Vadisi" atmosferini bərpa edərək sinemaseverlərə unudulmaz anlar yaşatmağı hədəfləyir.